Meiri sveiflur í virði tæknifyrirtækja en Bitcoin
Miklar sviptingar hafa verið á verði ýmsa tæknifyrirtækja sem mörg hver hreyfðust meira í verði en Bitcoin á síðasta ári
Undanfarna mánuði hafa hlutabréf margra stærstu fyrirtækja heims hreyfst ört þrátt fyrir að hlutabréfavísitölur hafi sveiflast minna. Þegar litið er á ávöxtun eftir atvinnugreinum er ljóst að ávöxtun er mjög misskipt og eru það sérstaklega fyrirtæki í hugbúnaðargeiranum sem hafa fengið að finna fyrir miklum lækkunum undanfarna mánuði. Kemur þar helst til umbreytingaráhrif gervigreindar sem eru að umbylta hverri atvinnugreininni á fætur annarri. Þegar horft er til sveiflna í virði tæknifyrirtækja á árinu 2025 var flökt í verði þeirra meira en í Bitcoin þegar horft til ársins í heild eins og sést á mynd hér að neðan.
AI-fjárfestingar og sveiflur
Stærstu tæknifyrirtækin eru að byggja upp innviði fyrir gervigreind á áður óþekktum hraða. Fjárfesting fer í ný gagnaver, örgjörva, orkuinnviði svo dæmi séu tekin. Í raun má líkja þessu saman við iðnbyltinguna á sínum tíma þegar miklar breytingar urðu í því hvernig störf eru unnin. Mörg störf urðu tækninni að bráð en ný störf urðu síðar til þegar jafnvægi náðist á vinnumarkaði.
Þessar fjárfestingar nema tugum milljarða dala árlega og birtast strax í rekstrartölum. Tekjurnar sem eiga að réttlæta fjárfestinguna koma hins vegar síðar. Þegar uppgjör sýna aukinn kostnað eða óvissu um hvenær arðsemi næst bregst markaðurinn hratt við og verðlagning breytist á skömmum tíma. Það eykur sveiflur í gengi.
Minni endurkaup hlutabréfa hafa áhrif
Samhliða uppbyggingu innviða hafa sum þessara fyrirtækja dregið úr eigin hlutabréfakaupum. Slík kaup hafa lengi stutt við gengi hlutabréfa þeirra og mun koma í ljós hve mikil áhrif þessar breytingar hafa á markaðinn. Eins og sjá má á þessari mynd eru endurkaup stærstu fyrirtækja heims mjög umsvifamikil og hafa án efa áhrif á verðþróun þeirra á markaði.
Þrýstingur á hugbúnaðarfyrirtæki
AI-þróunin hefur einnig haft áhrif á hugbúnaðarfyrirtæki. Þá hefur orðið auðveldara fyrir fyrirtæki að þróa hugbúnaðarlausnir sjálfar með aðstoð gervigreindar. Það dregur úr vægi hefðbundinna SaaS-fyrirtækja (e. software as a service). Breytt tekjulíkan og aukin sjálfvirknivæðing hafa því sett þrýsting á verðþróun þeirra fyrirtækja á markaði eins og sést á meðfylgjandi mynd.
Bitcoin og gull í samanburði
Í hugum margra eru sveiflur á verði Bitcoin meiri en flestra hlutabréfa en þegar betur er að gáð kemur annað í ljós. Það á ekki síður við á tímum sem þessum þar sem sveiflur í hlutabréfaverði hafa í mörgum tilfellum aukist. Óvissa um áhrif gervigreindar og órói í alþjóðamálum eru að valda miklum sveiflum á mörkuðum. Fjárfestar leita í skjól og þrátt fyrir hækkandi gullverð, þá hafa sveiflur í gullverði verið miklar. Sem dæmi um það lækkaði verð á gulli 9% á einum degi í lok janúar sem er mesta lækkun sem hefur sést í áratugi. Fyrsti viðskiptadagur í febrúar fór einnig í sögubækurnar þegar gull lækkaði 10% til viðbótar innan dagsins þótt dagslækkunin hafi verið tæp 5%. Hér sést sögulegt yfirlit á dreifni ávöxtunar á gulli sem sýnir hve miklar sveiflurnar eru orðnar.
Það má því segja að sveiflur í hinum ýmsu eignaflokkum hafi aukist undanfarið samhliða aukinni óvissu í heiminum. Það er líklega komið til að vera. Það er þó mikilvægt að hafa í huga, að í eignastýringu er áhættudreifing oft kölluð eini fríi hádegisverðurinn (e. free lunch) þar sem sveiflur í eignasöfnum minnka þegar safnið er samsett með ólíkum eignum. Hvort sem horft er til hlutabréfa, gulls eða Bitcoin má þó segja að sem betur fer hreyfast þessar eignir ekki alltaf í takt, enda væri ávinningur þeirra í eignasöfnum til áhættudreifingar þá að miklu leyti horfinn.