Notkun gervigreindar er rétt að byrja
Gagnaver anna ekki eftirspurn gervigreindar vegna skorts á reiknigetu
Á árinu 2026 áforma fjórir stærstu tæknirisarnir, Microsoft, Alphabet, Amazon og Meta, að verja um 700 milljarða dala í gervigreindarinnviði, sem er hátt í tvöföld upphæð ársins 2025. Þessi upphæð ein og sér nemur um 2,2% af áætlaðri landsframleiðslu Bandaríkjanna á árinu. Þetta er meðal þess sem vakti hvað mesta athygli fjárfesta við uppgjör félaganna í lok apríl, en samhliða sterkum tekjuvexti og framlegðaraukningu hafa fjárfestingaráform áfram verið að aukast.
Með þessum áformum eru félögin að bregðast við skorti á reiknigetu sem hefur farið vaxandi undanfarna mánuði. Sundar Pichai, forstjóri Alphabet, lýsti því yfir á uppgjörsfundinum í lok apríl að tekjur Google Cloud hefðu verið umtalsvert hærri ef félagið hefði getað mætt eftirspurninni með aukinni reiknigetu. Anthropic, sem þróar Claude mállíkönin, hefur ítrekað þurft að takmarka afköst hjá viðskiptavinum af sömu ástæðu og samdi nýverið við félag Elon Musk um 300 MW af orku í Colossus 1 gagnaverinu til að auka afkastagetu sína. Þessar takmarkanir liggja því ekki í fjármagni heldur í efnislegum innviðum: gagnaverum, örgjörvum, minni, raforku og öðru sem tekur langan tíma að byggja upp.
Þetta kann að virðast ógnvænlegt í fyrstu, en þegar litið er á sögulegar tölur um fjárfestingar er þessi uppgangur ekki einsdæmi. Sögulega hafa fjárfestingar í mikilvægum innviðum náð sömu umsvifum og jafnvel meiri.
Ýmsar greiningar hafa verið gerðar á notkun gervigreindar og gervigreindarþjónum (e. AI agents). Myndin hér að neðan sýnir að um 84% íbúa heimsins nota gervigreind ekki að neinu marki. Um 16% nota grunnútgáfur mállíkana án greiðslu, en aðeins um 0,3% greiða fyrir öflugri útgáfur. Það sem vekur þó sérstaka athygli er að aðeins um 0,04% heimsbyggðarinnar eru farin að nýta sér næsta stig tækninnar, þ.e. að byggja eigin verkfæri, sjálfvirkni eða lausnir með aðstoð gervigreindar.
Þessi mynd er sláandi af nokkrum ástæðum. Bæði nota 84% svarenda ekki gervigreind að neinu leyti og einungis 0,04% nota afkastamesta hluta hennar, svokallaða gervigreindarþjóna (e. AI agents). Þar er um að ræða sérhæfð kerfi sem geta framkvæmt verkefni og sinnt ákveðnum hlutverkum með sívaxandi sjálfstæði. Í greiningu Goldman sést einnig að notkun gervigreindarþjóna er varla mælanleg í dag, á sama tíma og spáð er að þeir verði langstærstu notendur gervigreindar innan fárra ára. Þetta sést vel á mynd hér að neðan.
Það sem gerir þessa þróun þó sérstaklega áhugaverða er að ólíkt mannfólki eru í raun engin eðlislæg takmörk fyrir fjölda slíkra kerfa sem fyrirtæki geta nýtt samtímis. Fyrirtæki framtíðarinnar gætu því starfað með hundruðum eða þúsundum sérhæfðra gervigreindarþjóna sem sinna afmörkuðum verkefnum samhliða starfsfólki. Við í Visku sjóðum þekkjum þetta af eigin raun og höfum búið til gervigreindarþjóna í starfsemi okkar frá því í fyrra og fer þeim hratt fjölgandi.
Þegar allt er tekið saman blasir við að gervigreind er enn á byrjunarreit, hvort sem horft er til fjölda notenda eða útbreiðslu gervigreindarþjóna sem er einn áhugaverðasti þáttur gervigreindar. Þrátt fyrir það þá annar núverandi reiknigeta ekki eftirspurn, sem mun þó að öllum líkindum vaxa enn hraðar á næstu árum. Það skal því engan undra að fjárfestingaráform fari vaxandi, enda er þetta líklega aðeins forsmekkurinn að því sem koma skal.